ريفيو- كريم بيتاديرم مضاد للألتهابات

كريم بيتاديرم -مضاد للألتهابات


مميزاته :- فعال جدا من اول استخدام - لا يقوم بالتقشير او ترك اثر كبقعه او غيرها - تمتصه البشره سريعا -متوافر في اغلب الصيدليات - سعره مناسب غير مكلف


استخدماته:-

1-لعلاج أي تهيج في البشره او التهاب لأي سبب وبلأخص بعد الشمس

2- بعد استعمال الفتله لأزاله الشعر الزائد في الوجه

3- بعد ازاله الشعر الزائد في الجسم بأحد الوسائل التقليديه (سويت - شيف- واكس)

4-اذا ظهر أي التهاب ناتج عن التعرض لحراره
5- اذا قومتي بعمل تقشير للوجه في احد مراكز التجميل

الاستعمال 
1- مرتين يوميا- مره صباحا ومره مساءا 

ريفيو- مرهم اكنيمايسين 2% للحبوب

مرهم اكنيماسين 2% لعلاج حب الشباب

أولا هو كويس جدا و فعلا بيجيب نتيجه كويسه 
مميزاته:- 
1- قبل أي حاجه أساسي يكون في غسول و تونر و مرطب مناسبين للبشره علشان تشوفي نتيجه من استخدام أي حاجه
2-خلال 3 أيام من استخداموا الحبوب بشكل كبير هتروح و طبعا لو الحبوب ملتهبه او فيها مايه هتاخد وقت اكتر من 3 أيام 
3- ملوش ريحه يعتبر بس لونه ابيض مش شفاف 
4- كميته هتفضل مده ,سعره رخيص فا هو بديل كويس لأي معالج للحبوب 
استخدامه :-
1- لازم البشره تكون مغسوله كويس بالغسول و لو الحبوب برزا او ملتهبه بلاش ابدا تدليك في أماكن الحبوب علشان متلتهبش اكتر او تنتشر الحبوب في باقي الوش 
2- مرتين في اليوم مره الصبح وتسبيه ساعه او ساعه و نص وبعدين تمسحيه و بليل قبل النوم و عايزه تنامي بيه نامي او تسبيه ساعتين وتشليه 
3- وانتي بتحطيه استخدمي القطن المخصص لتنظيف الاذن بحيث تحطي المرهم علي مكان الحبايه بس من غير أي زياده علشان غير ان المرهم هيسيح وهينزل علي باقي الوش وهيبهدل المنظر فا هو بردوا مبيفدش بحاجه الزياده في المرهم 
4-متتعرضيش للشمس اثناء استخدامه 

نصيحه كده في من نفس نوع المرهم محلول بلاش منه علشان بيقشر وبيعمل إحساس بالحكه وحش واحمرار

Review-Synobar Facial Cleanser-ريفيو -غسول سينوبار

 

غسول سينوبار 

المفروض ان انه مناسب للبشره الدهنيه والمختلطه 

وبيساعد في ان الحبوب تختفي 

مشفتوش مفيد ومكملتش اخر شويه فيه 

1- نشف الوش 

2- مبيعملش حاجه في موضوع الحبوب 

3- بيتغسل بصعوبه 

 علشان مرميهوش استخدمته كا شورجيل -رحته حلوه و كان مناسب لبشرة الجسم مش للوش خالص 

فا مش هكرره تاني مكنش حلو معايا 

-ولو بدوري علي بديل احسن منه بسعره تقريبا يبقي Fitbar هي صابونه بس احسن كتير وعكس كل عيوبه واتكلمت عنها في ريفيو هنا 

ريفيو- قناع حب الشباب من نفرتاري - (Review Acne Face Mask -Nefertari)

في الصوره في ماسكات من نفرتاري اتكلمنا عن الماسك اللي علي الشمال (ماسك كلاي الاخضر للبشره الدهنيه) وهتلاقوا هنا الREVIEW  في MINGLING  


https://minglinggalaxy.blogspot.com/2019/08/review-green-face-clay.html 

هنتكلم دلوقتي عن الماسك التاني اللي علي اليمين (قناع حب الشباب من نفرتاري)

ايه مكوناته هما كاتبين مطحون اعشاب و الحبوب! اعملوا نفسكوا بقي عرفتوا كده المكونات :D 
بس هو مفيد مفيد محدش يقلق :D 

مناسب للبشره الدهنيه 
مميزاته :- 
1- لما كان في حبوب - الاحمرار بتاعها هدي 
الحبوب نشفت مع الكريم اللي بستخدمه بليل اختفيت في 3 ايام بشكل نهائي (الكريم هتلاقوا عنه ريفيو في MINGING هنا)
2- من غير حبوب - نضف مسام الوش وشكلوا انقي 
3- بالتكرار كان من الحاجات اللي ساعدت ان الحبوب متظهرش و لو حبايه لسه هتبدأ تطلع بتنشف وتختفي 
4-الشركه موثوق فيها و كميته وسعره كويسين 

طريقة الاستخدام :- يغسل الوجه جيدا بالماء الدافئ والغسول 
1-تخلط نصف محتويات الكيس بالماء الدافئ حتي تتكون عجينه لينه تفرد علي الوجه (لا مش نص محتويات الكيس ولا حاجه لان هيكون كتير اوي :D -عملته انا واختي و اتبقي كتير فا ملوش لازمه نص الكيس ممكن كميه كويسه مع المايه تعمل ماسك متماسك تعرفي تفرديه علي الوش وبس كده)
2- ثم تدلك البشره جيدا وتترك علي الوجه لمدة 15 دقيقه (نقطة تدلكي ده لو مفيش ولا حبايه في وشك لكن لو في حبوب يبقي لا بلاش تدليك -هو اه ماسك للحبوب بس  كمان للبشره اللي عمتا اساسي بيظهر فيها حبوب فا ممكن يكون ف وقت مفيش فا تقدر تدلك اللي هو بتستخدمه بردوا كا حمايه من ظهور الحبوب - لو ف حبوب بلاش تدليك علشان متلتهبش وعلشان متنتشرش في باقي الوش) 

3- كتبين استخداموا 3 مرات اسبوعيا (استخدمته كل اسبوع مره واحده) وفادني 
4- بعد الماسك لازم تونر يقفل المسام و بنسبالي بستخدم مايه ورد نفرتاري كا تونر 

(Review) Bioderma Sebium Global-ريفيو عن سيبيوم جلوبال من بيودرما-علاج للحبوب

سيبيوم جلوبال Sebium Global 

استخدامي بدأ لما كان في كام حبايه رزليين كانوا رفضين يروحوا خالص فضلوا شهر او اكتر ولما روحة للدكتور كتبلي علاج كويس وهتلقوا هنا في MINGING شوفوا

 - بس الفكره ان لما فعلا اختفوا اتبقي اثر شويه بس يبان بردوا ,كمان ان كنت بتعرض للشمس كتيير ووقتها كنت بستخدم صن بلوك عملة ريفيو عنه بردوا بس مريحنيش 

المهم كان بيظهر حبوب صغيره 

الدكتور قالي ان ده هيضيع كل الكلام ده 

مميزاته:-

1- اثار الحبوب اختفت خالص بمعني خالص 

2- الحبوب الصغير نشفت واختفت 

3- الوش كله بقي نضيف اكتر 

4- مكنش بيظهر اي رؤس سودا في وقت استخدمه نهائي لان بردوا من ضمن الحاجات اللي بيشتغل عليها انه ينضف الوش من الرؤس السودا  وهتلاقوا ريفيو هنا في MINGLING عن جيل بنسبالي كان احسن حاجه للرؤس 

 

ده استخدامي التاني له حاليا للطوارئ كده لان عجبني لكذا سبب ومعجبنيش لسبب واحد بس وهو سعره ع 30 ml لدرجة ان حسيت ان وشي لم نفسه علشان الرقم ده :D بس لا جبوا يا جماعه محدش واخد منها حاجه :D كمان هينجز مش هيحتاج يتجاب منه تاني الا لو اتكرر حالة اثر حبوب و حبوب صغيره او في بقع بني او حفر خفيفه في الوش او رؤس سودا بس مش مبالغ فيها

طريقه استخدامه:- 

-كان مرتين في اليوم علي الوش كله مع تجنب حولين العين 

- مره الصبح ومره قبل النوم و ف المرتين لازم استخدامه بعد غسل الوش بالغسول 

ملحوظه كده متنسوهاش

• حوالين العين - حدود الانف (جوانب المناخير)- حدود الفم(حوالين الشفايف) بلاش يتحط اتجاهم خالص 

هيلهب و حيبقي في احساس بحكه وحش هيضايق وكمان ملوش لازمه  

(Review) Avene Thermal Spring water-مياه اليانبيع الحراريه من افين

اللي في الصوره اسبراي ماء حراريه من شركه افين 
نسبنا من الصوره ايه هي المياه الحراريه أساسا 
مياه الينابيع الحراريه :- بختصار هي أساسها مايه الامطار ومرت بمراحل كتير كده ساعدت علي ان المياه دي تكون بتحتوي علي عناصر مهمه جدا بتحتاجه البشره من معادن واملاح وبقوا بيستخدموها للتطهير والعلاج وكذا حاجه تانيه 

من الشركات اللي اتشهرت اوي بمياه الينابيع الحراريه Vichy بس انا عرفت متأخر حبتين كنت جبت ده ومطلعش وحش وهقولكوا دلوقتي :D هستخدم Thermal water بتاعت Vichy وهقولكوا ايه الوضع في الفتره الجايه 

استخدامي كان ازاي بقي :- بحطه في التلاجه ده مبدأيا 
1- استخدمته بعد التعرض للشمس -برجع اغسل وشي بالغسول وبعدين التونر و بعد كده برش رشتين تلاته كل الاحمرار والحراره اللي الوش بيكون عليها نتيجه الشمس فعلا هداها وبسيبوا ينشف علي الوش 

2- استخدمته بعد الفتله -بغسل وشي بردوا و تونر وبعد كده رشتين تلاته منه بيهدي الدنيا وبانلي فايدته في النقطه دي بذات بذات ان بعد الفتله معظم البنات بيحسوا بالحكه او الوش أساس بيحمر فا هو بيهدي الموضوع اوي بشكل ملحوظ 

3-استخدمته بعد ازاله الشعر باي طريقه من الطرق التقلديه و علي أي مكان في الجسم و كان فعلا بيهدي جدا جدا الاحمرار 

4-أوقات وشي بيستهبل لوحده و بيلتهب وكنت كل لما بروش منه كان بيهدي الوش لو مش من اول مره فا كنت برشه 3 مرات ف اليوم وعلي اخر اليوم التهيج اللي ف البشره ده بيهدي ويروح 

5-بيرطب الوش بالاخص بعد الجيم او ممارسة اي رياضه و في الصيف عموما بعد الشمس و الجو الحر بنحس الوش بيكون هلكان وهو مش اللي بيحيه يعني :D بس بيحسن شكله وبيهديه 

6- بينعش الوش و متكترووش في الرش منه لان الكتر منه بينشف وبيعمل زي قشر فا بلاش 
7- بيساعد لو في لسه باقي من الميك اب لو مشيتي قطنه علي الوش هبعد ما رشيتي منه هتلاقي شال الباقي بس الاحسن ان نغسل وشنا كويس زي الحلوين :D بالغسول كده لان ده مش الأساسي في استخدامه انه يشيل الميك اب 

طبعا للعلم هو مش هيحولك كوريا :D بس هيظبط من حاله البشره مع التكرار بذات للبشرتهم بتتلكك للالتهاب زي لان زي ما قولت في كل ريفيو بشرتي حساسه و مش أي حاجه بتظبط معاها

(Review) Green Face Clay - ماسك كلاي اخضر للبشره الدهنيه من نفرتاري

في الصوره في 2 ماسك من نفرتاري بس علشان كل واحد منهم ياخد حقه

 هنتكلم دلوقتي عن ماسك كلاي اخضر للبشره الدهنيه 

مكوناته :-لايت كوالين ,اعشاب الروزماري المطحونه 

سعره :- سعره كويس اوي وقتها كان ب 56 جنيه , لسه مخلصش وبقاله 8 شهور معايا لان بعمله كل عشر أيام بس و أوقات كل أسبوعين 
بس ممكن يتعمل كل أسبوع  لو عايزه هيكون كويس بس انا بزهق من الماسكات حقيقه :D فا انا كده عامله مجهود 
المهم ان شوفت معاه نتايج كويس برغم ان مبعملوش بنتظام و هنتكلم عليها وبفكر تاني انا الريفيو بتاعي اعتماد علي نوع بشرتي انا اللي هي كده كده حساسه في جميع الحالات و بتكون في فصل الصيف دهنيه و في فصل الشتا مختلطه 

صلاحيه :- لمده 11 شهر ودي حاجه كانت عجباني اوي لان زي ما قولت انا بزهق من الماسكات فا كنت عايزه حاجه تعمر معايا شويه :

الطريقه :- مع الماسك في كرت صغير مكتوب فيه الطريقه اللي هي :- 
1- اخلطيه بماء ورد (استخدمت مايه الورد من نفرتاري -وبستخدمها كا تونر هي حقيقي حلوه وبحتفظ بيها في التلاجه) متكتريش في مياه الورد هو بس علي قد انها تعمل مع البودر الشكل المتماسك للماسك 
2-ضعيه علي الوجه مع تجنب منطقه العين 
3- اتركيه 15 دقيقه 
5- اغسليه بماء الورد (ودي نقطه كويسه علشان تقفلي المسام بعد الماسك)

بينصحوا بأسخدامه 3 مرات أسبوعيا لبشره نقيه براقه , طيب يا جماعه انا معملتش الكلام ده اللي هو 3 مرات في الاسبوع بس لقيتها نقيه وبراقه فعلا مبيكدبوش :D بس مكنش مع نفسه كده كان بردوا في الروتين اليومي ثابت و الروتين الشهري و اللي هتلاقيهم هنا في MINGLING 

مميزاته من اول مره 
1-حسيت ان الوش اتعمله سكراب يعني نفس النتيجه بتاعت نضافه السكراب (حسيت.. لكن هو مش اسكراب علشان نبقي مجمعين مع بعض بس اقصد نفس النضافه اللي بتكون ظهره بعد الاسكراب :D) 
2-البشره فيها نضره حلوه لان اتنضفت من الافرزات الدهنيه  
3- الوش ناعم و البشره بتحسي نضفتها بأنها بتتنفس و مبينشفهاش 

مميزاته بالتكرار
 4-انا معنديش تجموعات للرؤوس السودا ,وده نتيجه الروتين و استعمال الجل اللي عامله عنه ريفيو هنا في MINGLING تقدروا تشوفوا هيفدكوا .. المهم ان الماسك مكان الرؤوس دي اللي هي بسيطه جدا نضفها و مكانها مفيش شكل مسام 
5- مع التكرار بتلاقي ان شكل البشره نفسها اتحسن مفيش حبوب في الغالب لان مفيش دهون متراكمه 

استعملوا هتستفادوا بيه 
له فايده - صلاحيته تمام اوي مع كميته - الشركه نفسها كويسه ويتوثق فيها - سعره كويس وده مش اعلان ولا حاجه :D لان كل الريفيوز هنا اعتماد علي استعمالي وبس كده فا ثقوا فيا :D

Ivatherm لعلاج الحبوب

Ivatherm Cream -علاج الحبوب

مبدائيا هو من احسن الحاجات اللي استخدمتها للحبوب بالأخص ان كنت رايحه لدكتور جلديه لأن في 4 حبوب في الخد حابين القاعده معايا و رافضين مهما استعمل ان يختفوا :D المهم ان الدكتور كتبلي الكريم ده 

هو مناسب للبشرتهم دهنيه بالاخص وعرضه للحبوب بس بلاش لو البشره حساسه لان انا بشرتي حساسه ولما اقعد استخدمه مده وشي اتحسس منه وكنت بحس بالحكه 

يعني الكريم ده اختيار ده كويس اوي اوي لو عندك حبوب سمجه رافضه تروح و تستخدميه لحد ما الحبوب تختفي وتوقفيه 

وف حالة ان في حبوب تظهر من الحبوب العاديه استخدمي اي نوع من اللي اتكلمنا عليه في روتين البشره الدهنيه هنا علي MINGLING شوفوا 

لقيتي الحبوب وقتها مرضيتش تروح ارجعي استخدميه وبردوا اول لما تروح تبطليه ولو بشرتك مش حساسه فالموضوع مش هيبقي مؤذي في حاجه 

قبل طريقه استعماله لازم روتين كامل معاه للاهتمام بالبشره لان لو في تراكم لافرزات الدهون تأثيره هيبقي بطيئ 

لازم غسول وتونر و مرطب خفيف و الامتناع بقدر المستطاع عن العادات الغلط اللي بتسبب ظهور حبوب وفي موضوع كامل عنها هنا في MINGLING 

والاهتمام بتغير غطا المخده كل يومين ده اساسي و علي قد ما تقدري بلاش الشعر يلمس الوش كتير علشان الزيوت اللي بتفرزها فروه الراس متتنقلش للوش وتتراكم و تتسبب في وجود حبوب 

كميته هتقعد مده كويسه اوي لان مش هتبقي محتاجه غير انك تحطي علي قد الحبه وبس فا بكده سعره هيكون معقول 

طريقه الاستعمال :- 

1-مره الصبح ومره بليل قبل النوم ونامي به 

الصبح اول لما تصحي بعد استخدام الغسول والتونر و بتحطي علي قد الحبايه بظبط 

مينفعش خالص التعرض للشمس وانتي حطاه

2-نص ساعه بالكتير ساعه واغسلي وشك بالمياه بس علشان البشره متتعودش عليه فا يبقي بعد كده ملوش فاعليه 

ولو هتخرجي مثلا الصبح و معندكيش وقت تحطيه وتستني ساعه فا ممكن لما ترجعي وتغسلي وشك بردوا بس بالغسول لازم الوش يكون نضيف قبل ما تحطي الكريم 

3-ليل نفس النظام بعد الغسول والتونر بتحطيه 

4-لما بتحطيه بيبقي في لسعه خفيفه بس كام دقيقه و هتروح 

هو علاج كويس بجد جدا للحبوب اللي مبترضاش تختفي فعلا ولو الحبايه فيها مايه هتنشف وتروح من خلال استخدامه 

غسول يرياج للبشره الدهنيه والمختلطه Review-URIAGE HYSEAC NETTOYANT

URIAGE Hyseac Nettoyant

Cleansing Gel 

غسول من شركه Uriage  الفرنسيه 

السلبيات ايوا هنبدأ بالسلبيات لانه معجبنيش للدرجه :D 

1- اولا مناسب للبشره الدهنيه بس و متكونش دهنيه حساسه اوي يفضل متكونش حساسه اصلا

وقت استخدامي بشرتي كانت مختلطه و علشان زي ما قولت قبل كده انا بشرتي بتختلف من فصل الصيف عن فصل الشتا بس في جميع الحالات بشرتي حساسه النوع اللي بيتلكيك بأي حاجه في الكوكب علشان يتقصر بها :D 

2- كا بشره مختلطه حساسه ,حسيته نشفلي وشي , مفيش نسبه ترطيب منه لبشره مختلطه 

3- مقارنه بكذا غسول تاني ده شويه بيتشل بعد كذا غسله يعني بيمسك في الوش شويه وده زهق يعني 

الايجابيات 

1- بينضف بضمير بس ده مكنش حلو مع حالة البشره الحساسه المختلطه 

2- بيسيب ريحه حلوه في البشره 

3- ممكن لو عجبك انه بينضف اوي كده ان تستخدميه مره الصبح بس او مره بليل بس في اليوم بس مع مرطب حلو مناسب للبشره وخفيف وميكونش عطري ويكون في بديل تاني مناسب للاستخدام في المره التانيه لغسل الوش 

بس كا للبشره الدهنيه اختي لما استخدمته كان كويس معاهاا بس بشرتها مش حساسه و مع طبيعه بشرتها فعلا بينضف بعمق و مسبلهاش اي جفاف للبشره بعكس ال حصل مع بشرتي 

لغسول وروتين كامل للعنايه بالبشره المختلطه الحساسه شوفوا باقي الافكار وال Reviews هنا علي   

https://minglinggalaxy.blogspot.com/2019/08/blog-post.html 

Effaclar Purifying Gel-La Roche Posay للبشره الدهنيه الحساسه

La Roche Posay شركه فرنسيه لمنتجات العنايه بالبشره الطبيه و اللي اثبتت فعليتها في العالم كله 

هو ايه الغسول ده؟ 

ده غسول Effaclar Purifying Gel

من La roche posay

مناسب لأي بشره؟

مناسب للبشره الدهنيه (الحساسه)

الصوره دي من تاني استخدام له لان عجبني وعدته تاني 

أولا كده استخدامي للغسول ده جه بالصدفه ,كل الفكره ان كنت رايحه العزبي اجيب الصن بلوك بتاع لاروش و اللي اتكلمت عليه فموضوع لوحده  بردوا في Mingling و لقيت هناك في الصيدليه بيقولي ان في عرض لاروش عملاه تحدي ال30 يوم للبشره الدهنيه وكان بسعر كويس مقارنه بسعر كل واحد لوحده من سنه الكلام ده وكان علي الحظ الغسول بتاعي علي وشك انه يخلص وحقيقي عجبني بغباء ولما خلص جبت منه تاني وحاليا بستخدم نوع تانب بس هرجعله لان مبكونش عايزه بشرتي تتعود علي نفس نوع الغسول وبحب اجرب واشوف ايه احسن 

1. ندخل في المميزات بتاعته
2. بينضف بعمق ومن اول مره بتحسي هو عمل ايه بالاخص لو في رؤوس سودا وبردوا قولنا حل كويس اوي للرؤوس السودا هنا 
3. مفهوش رغاوي كتير يعني مفهوش مواد كيماويه بنسبه كبيره 
4. مبيهلكش البشره وكان بيدايقني في كذا غسول ان بحس ان وشي في إحساس بالحرق كده وفي بقع حمره مع ان مبدعكش فيه
5. بيتغسل بسهوله ومبيفضلش حاجه منه علي البشره مش متعب خالص في غسيله 
6. رحته حلوة وبتفضل وقت علي البشره 
7. بنسبالي نقطه مهمه ان بحب بعد ما اغسل وشي احس ان وشي بيتنفس وهو فعلا عمل كده
8. ملمس الوش ناعم جدا و مش مشدود بالعكس مترطب مبينشفش البشره 
9. كل النقط اللي فاتت من اول استخدم , بالتكرار مبقاش في حبوب الصغيره البتظهر بسبب الشمس وطبعا مع الصن بلوك بتاعه كان الموضوع مساعد جدا 
10. فرق في شكل المسام بقت اصغر 
11. في نضاره واضحه نتيجه ان البشره فعلا نضيفه
12. الافرزات فعلا زي ما قالوا في التحدي بتاعهم مع ان مبصدقش الإعلانات بس مكدبوش لما قالوا انه بيفرق ف ان الافرزات الدهنيه هتكون اقل 
13. كميته كبيره هتقعد مده طويله معاكي وبالتالي سعره علي كده هيكون مش وحش
14. نقطه بردوا ان اول استخدامي له كان عندي حبايه علي وشك ان تلتهب وتكون برزا بس لحق الموضوع ملقتهاش عملت كده 
15. بردوا مع استخدامي له لما كان بيكون في حبايه هتبدأ تظهر وتكون وضحه لا مكنتش بتفضل حقيقي وبردوا كنت بلحقها بالمنتجات البسيطه للحبوب ال اتكلمت عنها في الموضيع التانيه في Mingling 

استخدامي 

1. مره الصبح اول ما اصحي ومره بليل قبل النوم 
2. ببل الوش بمايه فاتره وابدا متستخدميش مايه سخنه او دافيه حتي 
3. بحط كميه بسيطه من الغسول علي ايدي وبحطه علي الوش بحرك بصوابعي حركات دائريه بسيطه خالص ومن غير أي ضغط 
4. بسيبه من 15-30 ثانيه مش اكتر علشان الوش مينشفش 
5. بغسله وبنشف الوش كويس ويفضل بلاش الفوط انا بستخدم مناديل وبلاقي ان ده احسن 
6. بستخدم التونر بعد كده وطبعا النوع اللي تحبيه بس انا بشوف ان افضل تونر هو ماء الورد و  بالاخص اللي مفهاش أي لون بتكون طبيعيه اكتر و أمان اكتر 

شوفوا الموضيع التانيه اللي لها علاقه بالبشره و الاهتمام بها بالاخص البشره الدهنيه الحساسه ال بتحتاج اهتمام اعلي وبالذات في فصل الصيف والتعرض كتير للشمس 

Genove Dermatologics - Fluidbase للرؤوس السوداء

The Review about an important effective product 

(Fluidbase) 

من (Genove Dermatologics )  

15% AHA

Gel Forte 

30 ml

هو اساسي وفعال جدا في حاله وجود رؤوس سوده علي الانف وعلي الدقن والدكتور نصحني به وفعلا من تالت استخدام مبقتش الاقي رؤوس سوده 

• الصوره دي من تاني مره اشتريه وعلي وشاك ان يخلص ولما يخلص هجيب تاني لان فعلا هو الحاجه الوحيده اللي فادتني في موضوع الرؤوس السوداء 
• -خلينا نكون عارفين كام حاجه كده 
• الرؤوس السودا دي بتيجي منين ؟! دي بتيجي من تراكم الافرازات الدهنيه علي البشره وتجمعها علي هيئه رؤوس سودا و ان اصلا البشره دهنيه او مختلطه و المختلطه يعني فيها T-Zone دهنيه اللي هي منطقه الدقن و الانف بيكون عليهم طبقه دهنيه او زيتيه الملمس  
• -في حل نهائي للرؤوس السودا يتعمل علي مره واحده وخلاص كده مترجعش تاني؟ لا مفيش حاجه تقضي علي الموضوع نهائي ومترجعش تاني من مجرد استخدام منتج محتاجه اهتمام بصفه دايما
• يعني اه هي هترجع بس بشكل اقل كتير وفعلا مع استخدام غسول طبي مناسب للبشره و تونر والحفاظ علي ان اساسي حمام بخار كل شهر وماسك من مكونات طبيعيه كل اسبوع بجد وقتها مش هتدي فرصه اصلا للافرزات انها تتراكم و تكون رؤوس سوداء ومع ان تلاقي ان في بدايه ظهور للرؤوس رجعي شوفي سقطي اي خطوه ولا اهملتي في ايه و حطي الجل بليل قبل النوم بكده مش هتشوفي رؤوس سودا تاني الا لو اهملتي ومحفظتيش علي ان البشره تكون نضيفه باستمرار 
• لازمة الجل ده ايه؟ لازمته ان لما تيجي تستخدميه بليل قبل نومك بعد الغسول والتونر -مجرد نقطه منه علي الانف ونقطه كمان علي الدقن ومش محتاجه تعملي حاجه غير انك تفرديه علي المكان وبس -بنسبالي من تالت مره لاقيت ان مبقاش في رؤوس سودا و انتظمت مع الغسول و التونر و ماسك كل اسبوع بحبوب الفحم النباتي بتتجاب من الصيدليه و كل شهر حمام بخار وبعديه ماسك لان وقتها المسام بتكون مفتوحه بشكل كويس جدا فابيخلي البشره تستفيد من الماسك استفاده كامله -فمبقتش الاقي رؤوس سودا الا لما بهمل حاجه من الخطوات ال فاتت 
• فالجل ده خطوه مهمه ممكن تضفيها لروتينك لو لقيتي في تكون للرؤوس السوداء وهو ملمسه جل خفيف وهتحطيه علي المناطق اللي فيها رؤوس سودا تستخدميه 3 -5 ايام ورا بعض كل اسبوعين مثلا  قبل النوم و بتصحي عادي تغسليه الصبح واصلا بتلاقي المكان امتصه وبالتالي بردوا العبوه هتقعد معاكي مده حلوه لحد ما تخلص فا وقتها سعره هيبقي معقول جدا علي المده اللي هيفضل فيها لحد متجيبي واحد تاني 
• في نقطه خدوا بالكوا منها لان اكيد في حد زي في الموضوع ده , حوالين الانف بظبط ال هو الخط المحدد الانف بلاش يتحط عليه من الجل لان بنسبالي كنت متحسسه منه و سببلي حكه وبعدين عرفت من الدكتور ان بلاش احط علي اخر حدود الانف يفضل ان يتحط علي مكان الرؤوس السوداء بس ومش كتير بردوا علشان الجلد عموما ميتحسسش 
• لو حالة الرؤوس السوداء اعمق فا يفضل تضيفي لاصقات الانف ومش هفتي فالنقطه دي لان مستخدمتهاش بس تقدري تروحي صيدليه كويسه فيها دكتوره تنصحك بنوع كويس وفعال وتضفيه لروتين العنايه الاسبوعيه بعد حمام البخار مباشرتا وبعده ماسك من مواد طبيعيه يعني تكوني انتي ال عامله الماسك في البيت او ماسك مناسب من ماسكات نفرتاري بثق فيهم جدا وفعلا حاجاتهم طبيعيه 
• تحذير ونصيحه اخويه :D بلاش يا جماعه افكار مؤذيه زي من نوع ان نحط معجون علي الرؤوس السوداء وندعك بالفرشه! ال يمشي علي سنانك ميمشيش علي وشك ابدا والله ده غلط وهلك غير طبيعي للبشره وبيرجع الرؤوس اكتر واكتر وكمان بيسبب التهاب وشوفتها مع كذا حد ان طلعتلهم حبوب تحت الجلد بدل الرؤوس السودا فبلاش تسمعوا لوصفات غريبه لان كل حاجه معموله لاستخدمها وبس يعني لو المعجون لي فايده تانيه غير انه للسنان كانت شركات معجون الاسنان مخبوش فايدته عن الناس والله ده حتي هيزيد اقبال الناس عليه :D وغيرها من افكار ,وبس كده شكرا :)

عادات يوميه مفيده للبشره

عادات يوميه بسيطه لبشره افضل 

كتير مننا شويه بيكون فيه عشوائيه في الاكل ويا سلام لو مكتئب شويتين و بتطلب معاه شوكلاته و حلويات واكل مقلي و fastfood  و اللي هو يا نهار سكريات و كربوهيدرات ودهون مشبعه نسيبنا من زياده الوزن لان هنتكلم عليها لوحدها بالتفصيل لانها ليله كبيره اوي اوي لا ده كمان بشرتك مش هتسكت وهتعرفك انك مش موفقه علي المعجنه اللي بتحصل في الاكل دي 
هيبانلك في لون بشرتك - شوائب - بقع - حبوب - شحوب مفيش نضره - جفاف 

طيب ايه بقي اللي ممكن نقدمه نساعد بيه بشرتنا ان تكون في حاله احسن طبعا بالاضافه لمراحل العنايه بيها من غسول وتونر و مرطب وواقي الشمس الصبح و ده اللي قولناه بالتفصيل في الموضيع التانيه 

1. النوم - اساس النوم حد ادني 4 ساعات ويبقي كويس اوي لو 8 بس يكونوا من 4 ل 8 ساعات بليل ,البشره والجسم بيخدوا كل الفايده في نوم بليل 
2. شرب المياه- مهم جدا 8-12 كوبايه ولو في رياضه خلال اليوم او حركه يبقي نزود في المياه وطبعا يبفضل توزعهم علي اليوم مش مره واحده نفتكر و نشرب كذا كوبايه ,لو كل ساعه او ساعه ونص كوبايه مياه حتي لو مفيش عطش هيكون كويس جدا للجسم و للناس اللي بتنسي تشرب مياه خلي ازازه معاكوا مع كل حركه -ولو من اللي بشربوا كافيين كتير يبقي بعد كل مره يكون في كوبايه مايه (للناس اللي ماشيه علي دايت فا شرب المياه بيدي حاله من الشبع وبردوا احتياج الجسم للمياه اواقات الجسم بيترجمه علي انه جوع فا يبداء يطلب ان ياكل مع انه اصلا احساس عطش فا اهتموا جدا بالمياه هتساعد)
3. السلطه- خلي دايما جنب واجبه الغداء يكون في طبق سلطه محترم وفريش كده -الخضار معروف قد ايه هو مفيد للجسم عموما وللبشره خصوصا وفي نقطه النضاره بذات (وكمان بنسبال اللي بيعملوا دايت فهو حاجه كويسه جدا تبدأوا بيها وجبه الغدا لان بتشبع وبتملي المعده)
4. بلاش سكريات وبلاش Fastfood طبعا صعبه بس مبنقولش لا خالص بس بالمعقول ,يعني ميكونش الاعتماد في الاكل علي دول علي طول 
5. قللوا بهارات و مخللات علشان الاملاح ولان بردوا كترها بيساعد ان الحبوب تطلع وتطلع كمان ملتهبه 
6. اتاكدوا من الفاكهه او الاكلات اللي ممكن يكون عندكوا حساسيه منها و بطلوها (مانجه-فراوله -خوخ ..وغيرهم) لان كتير مبنكونش عرفين ان عندنا حساسيه من فاكهه او نوع اكل معين وبنكرر ناكله ومبنخدش بالنه انه بيقصر علي البشره وبيعرضها لالتهاب او احمرار مش من طبيعه البشره او حبوب صغيره و اوقات كتير جنب الفم 
7. العصاير الفرش حلوه و بتنعش الجسم والبشره وبالذات عصير البرتقان و الجزر واقروا بالتفصيل عن فايدته 
8. لازم حمام بخار كل شهر يجدد حيوة البشره وينضفها من الاعماق -لازم علي الاقل ماسك كل 10 ايام يناسب نوع بشرتك ويفضل لو من مكونات طبيعيه 
9. قبل استخدام الفتله لازالة الشعر الزائد في الوش اتأكدي ان بشرتك نضيفه عن طريق غسل الوش بالغسول ووضع التونر ,لازم الفتله تكون نضيفه و الفرشه والملقاط المستخدمين يكونوا حاجات خاصه بيكي انتي متعتمديش علي اللي موجودين في المكان و بردوا بعد كل مره لازم تعقمهم لعدم تراكم البكتريه 
10. وميفضلش ابدا ان تلمسي وشك ببأيديك مباشرة استخدمي المناديل و بلاش مناديل عطريه علي الوش لمنع اي التهاب
11. غطا المخده كل يومين لازم يتغير (يوم نامي علي احد اوجوه المخده و اليوم التاني علي الواجه الاخر) وده علشان ميتنقلش بكتريه ودهون من المخده للوش اثناء النوم لان الشعر والبشره بيفرزوا دهون اثناء النوم وطبعا المخده بتمتص ده وبالتالي ممكن تنقله للبشره 
12. لو من مستخدمي الميك اب خلي فرشك و الاسبونج و اي حاجه هتستخدميها تكون بتاعتك انتي بس و لازم مره علي الاقل في الاسبوع تغسلي الفرش و الاسبونج وينزلوا اي حاجه فيهم وغيرهم وهاتي غيرهم كل 3 اسابيع بالكتير شهر
13. حفظوا علي غسل الايدين بستمرار حتي لو مفيش سبب لان بتلقائيه كلنا وارد ان ايديك تيجي علي وشك لاي سبب اقلها لما بتسندي وشك علي ايديك فا برضوا دي وسيله لنقل بكتريه وبالتالي التهاب او حبوب بالتكرار 

مقارنه بين واقي الشمس من Bioderma - la roche posay -vichy

Sunscreen 

(Bioderma - La roche posay - Vichy) 

الشمس بالرغم من ان الشمس بتمد البشره والجسم بفيتامين د المهم جدا لصحه العظام وبيحفز الامعاء علي عمليه امتصاص الكالسيوم و الفسفور في الجسم و منع الخالايه السرطانيه من النمو و بيقوي جهاز المناعه وده كله علشان نستفيد بيه بيكون بين 8 ونص الصبح ل 11 قبل الضهر بعد كده بيكون في اشعه فوق البنفسجيه وغيرها من الاشعات الضره البتقصر علي صحه الجلد وشكله و مرنته عن طريق تقليل نسبه الكولاجين في البشره و تكوين بقع اغمق من درجه البشره (افضل وقت للاستفاده من اشعه الشمس المفيده هي من 10 دقايق ل ربع ساعه تلات مرات في الاسبوع)

اهميه واقي الشمس هو ان البشره غير ان لونها ميتغيرش ويحصل اسمرار فهو بردوا حمايه من اشعات الشمس المضره و من تصبغات الشمس اللي بتخلي في بقع اغمق من درجه البشره وومكن تتحول لبقع بنيه داكنه وكمان بتأثر علي نضرتها و اللي مع الوقت تكرار التعرض للشمس بدون واقي بيؤدي الي ظهور التجعيد مبكرا وبالتالي بشره شاحبه ومفتقره لمظاهرالحيويه والشباب.واقي الشمس خطوه مهمه جدا مينفعش تتجهليها لو بتحفظي علي انك تفضلي بشرتك شكلها نضره وشباب لعمر اطول 

من استخدامي للتالت انواع من واقي الشمس من الشركات دي 

ودول للعلم هما من اكبر و اهم الشركات الطبيه للعنايه بالبشره واالاغلب عليهم reviews علي مستوي العالم كويسه جدا و الدكتور بتاعي نصحني بكذا منتج من الشركات دي وفعلا فعاله و مش مجرد اسماء واسعار وبس 

واختصارا علي اللي ميحبش يقرا ال review تفصيليا فا la roche posay كان الانسب ليا بالاخص (بشرتي في جميع الحالات حساسه -بس في الصيف بشره دهنيه و في الشتا هي بشره مختلطه) و مبطقش اي حاجه تقيله علي بشرتي لان حتي الحاجات التقيله اللي ممكن نحطها علي البشره بتتسبب في تراكم طبقات دهنيه وبالتالي حبوب ,فا اللي زيي هيرتاح مع sunblock la roche posay , ممكن كمان ال نقول انه يساويه ويعادل فعليته بشكل كبير اوي يكاد يكون مفيش اختلاف هو Vichy لكن بنسالي حسيت من الاستخدام ان مرتاحه ل la roche posay بالاخص ان وقتها استخدمت معاه الغسول بتاعه وكان مناسب جدا وحتي بعد ما غيرت الغسول فا la roche posay كان الانسب والافضل ولحد دلوقتي بستخدمه 

بالتفاصيل 

1. bioderma يمكن معظم البنات الاستخدموه بيفضلوا لان معروف ان في منه بالفونديشن بتاعه وبالتالي مفيش حبوب هتبان و هيكون في توحيد للون بشكل مؤقت يعني وقت استخدامه و ممكن يدي لوك مثالي شويه لبشره شبه صافيه بس حقيقي في استخدامي له سواء بفونديشن او لا كنت بلاحظ انه بيساعد بنسبه علي ظهور حبوب بصفه دايما وكنت مستغربه ان ازاي! بس فعلا لما بطلت استخدمه مبقاش يظهر حبوب غير كل فتره وفتره بالشكل الطبيعي ,غير ان مقارنه بالمنتجات التانيه كان الاتقل بنسبالي 
2. Vichy كان كويس وخفيف وزي ما قولت انه يساوي la roche ممكن اليستخدم سواء ده او ده يرتاحله لانهم هما الاتنين خفاف علي البشره و سهل جدا توزعهم و مش هتحتاجي منه كتير علشان يكون فعال بس اي sunblock بتجدديه كل 2 ل 3 ساعات بالكتير لحمايه اكتر للبشره 
3. المميز في la roche posay انه خفيف اوي البشره بتمتصوا بسرعه ومبتحتجيش تحطي كميه وفعلا مبحسش ان انا حطه اي حاجه ملوش اي ريحه ولا حتي لون بس كمان بيدي ترطيب حلو للبشره كأن حطه مرطب وبالتالي بيكون في نضره طبيعيه وشكل حيوي للبشره 
4. طبعا ايا كان نوع بشرتك متنسيش ان اساسي يكون الوش مغسول كويس اوي بالغسول ومن بعديه التونر لقفل المسام و تسبيه ينشف وبعدين واقي الشمس بكيمه مناسبه وابدا مش بالكتره و يفضل تسيبي وشك ربع ساعه قبل استخدام اي ميك اب ولو من غير ميك اب يبقي نص ساعه بعد وضع واقي الشمس وقبل التعرض للشمس 

البشره الدهنيه الحساسه - Oily Senstive Skin

التعامل مع البشره الدهنيه الحساسه-Oily Senstive Skin 

البشره الدهنيه اكتر نوع معرض للحبوب نتيجه للافرازات الدهنية في حاله عدم الاهتمام بالبشره بالشكل الكافي 

والبشره الدهنيه بيكون واضح ومعروف ان دايما البشره بيكون عليها طبقه دهنيه وفي لامعه وبتكون منتشره في البشره كلها في الغالب  

والحبوب اللي بتظهر فيها بتكون نتيجه تراكم الافرزات الدهنيه فيكون لازم التخلوص من الافرزات الزياده دي بشكل يومي عن طريق كذا خطوه بسيطه هنتبعها 

هنتكلم عن البشره الدهنيه (الحساسه) بالاخص لان التعامل معاها بيكون متعب 

-هنحتاج نثبت كل شهر ان نعمل حمام بخار في احد مراكز العنايه بالبشره الموثوقه او يتعمل في البيت بشكل امين مظبوط ميأذيش البشره 

-مسك كل اسبوع وابسطهم مسك حبوب الفحم (حبايه او اتنين من حبوب الفحم النباتي Eucarbon بتكون موجوده في اي صيدليه بنطحنها بمعلقه وبنحط عليها نقطين من ماء الورد (نفرتاري نوع كويس) ونقلب لمجرد ان يدي شكل متماسك كا ماسك لكن ميبقاش مياه ..او ماسك البشره الدهنيه من نفرتاري فعال بردوا زطريقته بتكون موجوده في الورقه البتكون مع الماسك 

1. هنثبت غسول و صابونه (الغسول الصبح اول لما نصحي و المره التانيه قبل ما ننام وافضل نوع Avene Cleanance Gel و هو نوع فعال جدا وبينضف البشره من الافرزات والرواسب و من اي رؤوس سوده فوق الانف او علي الدقن وبيسيب البشره نعمه ومبينشفهاش و كمان ريحته منعشه و مع تكرار الاستعمال بيسب لمعه حلوه في البشره بس لامعه نضاره مبتكونش لامعه ناتجه عن ان الغسول مثلا في باقي منه لسه علي البشره لا بالعكس بتكون لامعه ناتجه عن الاهتمام و النضافه ,,هنحط نقطتين او تلاته من الغسول في كف الايد بعد ما نكون رطبنا الوش بشويه مياه وبعدين بنفرد كميه الغسول اللي فالايد علي الوش كله هو ملمسه جل ومع تحريكه علي الوش هيحول لرغوه خفيفه هنحركها علي الوش براحه في حركات دائريه بدون فورشه سيليكون او غيره لتجنبب ان لو في حبوب متلتهبش او تنتشر في باقي الوش)..( الصابونه فالصابونه هتكون قبل استخدام الميك اب او الخروج عموما لكن لو يومك كله في البيت مش هتحتاجي للمره دي كا غسل الوش بالصابونه , هتكتفي بالمرتين بتوع الغسول اللي قولنا عليهم ,وصابونه حلوه وفعاله برغم سعرها البسيط هي Fitbar)  
2. لازم يكون في  تونر نقفل بيه المسام بعد غسل الوش بالماء الفاتر و الغسول ابسط نوع للتونر هو ماء الورد ويفضل وضعه في التلاجه بحيث كل مره تستخدميه بيدي إحساس حلو بالانتعاش و بشوف ان احسن ماء ورد هو ماء  ورد نفرتاري تقدري تشتريه من اي فرع لنفرتاري وبردوا سعره بسيط مقارنه بأي تونر تاني من المنتجات المعروفه (ازازة ماء الورد ممكن نفضيها في ازازه سبراي (بخاخ) لمجرد ان تسهل اكتر متحتاجيش اكتر من ان هترشي الوش بالسبري رشتين وتسيبي الوش ينشف من نفسه وطبعا بلاش رش كتير لان كده هتخلي البشره تنشف و يكون فيها جفاف و ممكن بدل البخاخ عادي تحطي علي قطنه و تحركيها علي وشك وبعدها تسبيه ينشف لوحده )
3. قبل النوم بعد غسل الوش بالغسول و وضع التونر وبعد ما التونر بينشف بنستخدم مرطب طبي خالي من اي مواد عطريه بما ان البشره حساسه ولازم واساس ان يناسب البشره الدهنيه ميكونش أي مرطب وخلاص لان لو اي مرطب هيكون تقيل علي البشره وهي اصلا بتفرز دهون فا الموضوع هيتقلب لضرر بدل فايده وهيخلي في حبوب تظهر وافضل مرطب للحاله دي بيتحط منه نقطه واحده تتوزع علي الوش كله  (هو كريم بيبانثين - Bepanthen) هنستخدم بيبانثين الازرق هو الاخف فيهم لان الروز منه و البرتقالي لاستخدمات تانيه 
4. في حالة وجود حبوب بس ميكونوش كتير وجنب بعض لان في الحاله دي لازم دكتور يشوف ايه انسب للحاله بدل ما حالتها تسوء .. هنستخدم  بليل بس كريم (اكرتين 0.025% -Acretin 0.025% )علي الحبوب علي قد مكانها بظبط وقبل النوم مباشرتا لعدم التعرض لأي ضوء و يفضل توزيع الكريم بقطنه تنظيف الاذن لضمان ان يكون علي قد الحبايه بس
5. وفي حالة ان البشره هاديه و مفيش حبوب فا مره كل اسبوع قبل النوم بعد كل الخطوات اللي فاتت بس ميكونش في حبوب هنجيب قطنه هنحط عليها لبن كامل الدسم حاجه بسيطه وهنمشيها علي الوش وينشف الوش شويه وننام بيه ,فايدة الخطوه دي ان اللبن مضادة الاكسده اللي فيه وغيرها من مكوناته بتساعد علي ازاله اي شوائب ممكن تكون موجوده حتي بعد الغسول و التونر كمان فايدة اللين من الحاجات اللي بتساعد علي توحيد اللون و تهدئه اللالتهابات و مساهم بردوا في تفتيح البشره بنسبه بسيطه 
6. مع الاستمرار علي الخطوات اللي فاتت هنلاحظ تجديد في البشره ونضافه و انها صحيه اكتر ونضره واقل عرضه للحبوب وكل المعلومات اللي فوق اعتماد علي دكاتره جلديه متميزين في المجال و فعلا لقيت فيهم نتيجه كبيره ووضحه 

البشره المختلطه-Comination Skin

Combination Skin  - البشره مختلطه

• البشرة المختلطه في الانجاز كده ,هي البشره اللي بتجمع بين البشره الدهنيه و البشره العاديه 
• واكتر علامه بتوضح ان البشره دي دهنيه ,بمجرد ظهور طبقه دهنيه علي منطقه الانف و الجبهه (T-Zone) ,واوقات علي الدقن 
• و الافرزات الدهنيه فالغالب تكون ازياد في الصيف نتيجه للحر والرطوبه والتعرق اللي بيتسبب ففتح المسام ونتيجه للجو تجمع الاتربه وغيرها علي البشره و اللي في الغالب بيكون رؤوس سوده 
• وطبعا بيزيد الوضع تعقيد لو البشره مختلطه وحساسه او معرضه للحبوب و ان كمان نوع البشرة بيختلف من فصل للتاني 
• والحاله الوصفتها هي دي تحديدا حالتي في الصيف :( بس اتكيفت مع الموضوع وفهمت طبيعه بشرتي وايه المحتاجاه 
• من خلال الموضوع ده هقولكم علي منتجات استخدمتها وكانت فعاله جدا و عادات ساعدت ان بشريتي تكون اغلب الوقت صافيه وناقيه وللامانه ممكن تظهر حبايه كل فتره و بردوا هنتكلم علي حل للحبايه دي 
• تحديدا هنتكلم عن نوع البشره المختلطه -حالتها حساسه و معرضه للحبوب 

1. هنثبت غسول وصابونه .شخصيا ارتحت في الاستخدام لغسول Pharmaceris Deeply Cleaning foam بيكون عباره عن رغوه <الصابوه Fitbar .
2. بنستخدم الغسول لوحده الصبح بس اول لما تصحي (ببل الوش مايه خفيف و بوزع الكميه الحطيتها علي ايدي من الغسول علي الوش وبحرك ايدي علي شكل حركه دائريه براحه و لمده 30 ثانيه وبعدين بغسله- يفضل لو في حبوب في البشره ميبقاش في اي دعك في الوش ولا بالايد ولا بالفرشه السليكون هو مجرد توزيع الغسول علي البشره و نسيبها 30 ثانيه -علشان الحبوب متلتهبش ولا تتنقل في باقي الوش) 
3. الصابونه ممكن مرتين في حاله ان مثلا هتخرجي او هتحطي ميك اب فا هتغسلي وشك قبلها بالصابونه و المره التانيه قبل النوم ونفس فكره استخدام الغسول سواء في  حبوب او لا (في حاله ان مفيش حبوب ولاهتحطي ميك اب يبقي اكتفي بمره واحده لاستخدام الصابونه بالليل قبل النوم)
4. بعد كل مره هغسل وشي (بالمياه الفاتره) هحتاج اقفل المسام وابسط تونر ممكن تستخدميه هو ماء الورد ويفضل تتأكدي انه ماء ورد من غير اضافه الوان يفضل الاحتفاظ بها في التلاجه هتكون منعشه اكتر .احسانهم بنسبالي ماء ورد نفرتاري (ممكن نجيب الازازه ونفضيها في بخاخ بحيث نرش علي الوش ببساطه ونسيبوا ينشف لوحده وطبعا مش بكتره علشان ميعملش جفاف للبشره ولو مفيش بخاخ يبقي بقطن عادي وبردوا براحه من غير ضغط ولا شد في البشره ) 
5. خطوه كمان ممكن تكون اضافيه يعني لو محبتوش تعملوها مفيش مشكله بس هو من الحاجات الكويسه البتهدي البشره من أي اللتهاب خاصه بعد استخدام الفتله هو( ماء البابونج من اريج Blue Chamomile-Areej Aromatherapy ) او ممكن (ماء ثيرمال Eau Thermal -Avene ) الاتنين عباره عن اسبراي -ماء البابونج بيتجاب من اي فرع لأريج - ماء ثيرمال بيتجاب من اي صيدليه متاح فيها منتجات  Avene                         
6. خطوه كمان لو البشره مفهاش حبوب او التهاب في نقطه حلوه اوي هي استخدام سيرم كولاجيرا وهو محتواه فيتامين C من ضمن الحاجات اللي بتحتاجلها البشره وبتحسن من شكلها بس هو بيستخدم بليل بس قبل النوم بظبط ويفضل كمان عدم التعرض لأي اضاءه وبتنامي بالسيرم .ملمسوا خفيف جدا ورحته كمان مقبوله والبشره بتمتصوا بسرعه فا بيدي إحساس انك محتطيش أي حاجه اصلا و نقطتين تلاته بيكفوا البشره ومع الاستمرار عليه كل يوم بليل هتخدي بالك من الفرق اللي بيكون واضح ان البشره نضره و ملمسها ناعم ومترطبه Kolagra Skin Serum rich in vitamin C
7. اخر حاجه بقي في حالة ان في حبوب بنستخدم (اكنيمايسين مرهم) بس للحبوب ال هي مش مراضيه(كتيير وجنب بعض) ولا كبيره لان في الحالتين دول لازم دكتور